ವೇದಗಳ ಕಾಲ ಮತ್ತು ಪುರಾಣಗಳ ಕಾಲದ ಅಂತರ
(ದಿ. 1-1-1992 ಧರ್ಮಪ್ರಭ ಸಂಚಿಕೆಯಲ್ಲಿ ಪ್ರಕಟವಾದ ಒದುಗರಪತ್ರಗಳಿಗೆ ದಿ.ಲಂಕಾ ಕೃಷ್ಣಮೂರ್ತಿಯವರು ಕೊಟ್ಟ ಉತ್ತರದ ಲೇಖನ)
ಪ್ರಶ್ನೆ:- ವೇದಗಳ ಕಾಲಕ್ಕೂ ಪುರಾಣಗಳ ಕಾಲಕ್ಕೂ ಅಂತರವಿದೆಯೆ? ಹಾಗಿದ್ದಲ್ಲಿ ಅಂತರವೆಷ್ಟು?
ಉತ್ತರ : “ಪುರಾಣ” ಎಂಬ ಶಬ್ದದ ಅರ್ಥ “ಪ್ರಾಚೀನ” ಎಂದು. “ವೇದ” ಎಂಬ ಶಬ್ದದ ಅರ್ಥ “ಜ್ಞಾನ” ಎಂದು. ಈಗ ನಮಗೆ ಲಭ್ಯವಾಗಿರುವ ವೇದಗಳೇ ಪೂರ್ಣ ವೇದಗಳಲ್ಲ. ವೇದ ಪರ್ವತಗಳಲ್ಲಿ ನಾಲ್ಕು ಹಿಡಿಗಳಷ್ಟು.
ಚಾರಿತ್ರಿಕವಾಗಿ ವೇದಗಳು ಪ್ರಪಂಚದ ಸಾಹಿತ್ಯದಲ್ಲೇ ಅತ್ಯಂತ ಪ್ರಾಚೀನ. ಇವು ಒಂದು ಕಾಲದಲ್ಲಿ ರಚಿತವಾದವುಗಳಲ್ಲ. ಕಾಲಾಂತರದಲ್ಲಿ ಇವುಗಳು ನಷ್ಟವಾಗಿ ಪುನಃ ಲಭ್ಯವಾದಷ್ಟು ವ್ಯಾಸರಿಂದ ನಾಲ್ಕು ಭಾಗಗಳಾಗಿ ವಿಂಗಡಿಸಲ್ಪಟ್ಟವು. ವೇದಗಳಲ್ಲಿಯು ಸಹ ಪುರಾಣದ ಉಲ್ಲೇಖವಿರುವುದರಿಂದಲೂ, ಪುರಾಣದಲ್ಲಿ ಸೃಷ್ಟಿ, ಪ್ರತಿಸೃಷ್ಟಿ, ವಂಶ, ಮನ್ವಂತರ, ವಂಶಾನುಚರಿತ ಎಂಬ ಐದು ಲಕ್ಷಣಗಳಿರುವುದರಿಂದಲೂ ವೇದಗಳ ಜೊತೆಯಲ್ಲಿಯೇ ಪುರಾಣ ವಾಙ್ಮಯವೂ ಬೆಳೆಯುತ್ತ ಬಂದಿರಬೇಕು. “ವ್ಯಾಸ” ಎಂಬುದು ಒಬ್ಬನ ಹೆಸರಲ್ಲದೆ ಒಟ್ಟಾಗಿದ್ದ ಜ್ಞಾನರಾಶಿಯನ್ನು ನಾಲ್ಕು ವೇದಗಳ ರೂಪವಾಗಿಯು ಪುರಾಣವಾಗಿಯು ವಿಭಜನೆ ಮಾಡಿದ ಕೆಲಸವನ್ನು ನಡೆಸಿಕೊಂಡು ಬಂದವರ ವೃತ್ತಿಯ ಹೆಸರೆಂದು ಕಾಣುತ್ತದೆ. ವೇದ ಮಂತ್ರಗಳು ಸಹ ಮುಂದೆಯು ವೇದಗಳಿಗೆ ಸೇರಿವೆ. ಹಾಗೆಯೇ ಮುಂದೆ ಬಂದವರು ಪುರಾಣಗಳಿಗೆ ಅನೇಕ ವಿಷಯಗಳನ್ನು ಸೇರಿಸುತ್ತಲೇ ಬಂದಿದ್ದಾರೆ. ಭಾಷೆಯ ದೃಷ್ಟಿಯಿಂದಲೂ ರಚನಾವಿಧಾನದ ದೃಷ್ಟಿಯಿಂದಲೂ ವೇದಗಳ ಬೆಳವಣಿಗೆ ಪ್ರಾಚೀನ ಕಾಲದಲ್ಲಿಯೇ ನಿಂತುಹೋದರೆ ಪುರಾಣಗಳ ಬೆಳವಣಿಗೆ ನವೀನ ಕಾಲದವರೆಗೂ ಜರುಗುತ್ತಲೇ ಬಂದಿದೆ. ಪುರಾಣ ಶೈಲಿ ಸಾಮಾನ್ಯ ಜನರಿಗೆ ವೇದದಲ್ಲಿನ ಜ್ಞಾನವನ್ನು ಹಂಚಲು ಅನುವಾದ ಕಲ್ಪನಾ ಸಾಹಿತ್ಯದ ಶೈಲಿ ಎಂದು ನನ್ನ ಅಭಿಪ್ರಾಯ. ಇದಕ್ಕಿಂತಲೂ ಹೆಚ್ಚಾಗಿ ಅಂಕಿ ಅಂಶವನ್ನು ನಾನು ಕೊಡಲಾರೆ.
– ಲಂಕಾ ಕೃಷ್ಣಮೂರ್ತಿ